《遺物》
福爾摩斯可以從一個人嘅衣著同痕跡推斷出呢個人係點，我哋唔係福爾摩斯，但當你整理一個人嘅遺物時，你都可以好似歷歷在目咁幻想到呢個人嘅生活同過去。
住返係同細佬一齊長大嘅房，佢離開咗我哋嘅生活，但佢嘅所有都留存係呢個空間。
最重要嘅當然係電話，你可以睇到佢幾年幾月幾日影過咩相，去過邊，做過乜，同邊個係一齊，幸運嘅話，你仲可以聽到佢熟悉嘅聲音，同時你可以玩到佢曾經玩過嘅遊戲。
仲記得細佬係醫院最後嘅日子，我陪佢時玩返一隻當年佢推薦我玩嘅遊戲，佢已經玩到最後一關，但硬係通過唔到，我同佢講，等我幫你打羸佢啦，然後幾個通宵嘅晚上，我重覆又重覆挑戰升級，面對最後一關佢仲未通過嘅關卡時，我望住個boss，明明仲有一下就可以結束到佢，但好多次都故意輸俾佢，等呢一關唔會完結。
之前有一個網友講佢係一部舊遊戲機入面搵到爸爸嘅記錄，兩父子陰陽相隔地競技，而個仔都知，當佢超越咗爸爸，呢個存檔都會被取代，每次佢去到最後一刻都會停低，等爸爸超越自己；另一個媽媽因為患病，唯一寄托就係動森去建設小島，當佢離開後，子女發現原來媽媽係遊戲入面不斷向自己贈送禮物，仲有不同嘅留言。
而細佬嘅電話號碼仲未取消，因為一取消就會重新回到供應商之中，有日可能會有一個陌生人用呢個號碼，而保留係電話入面嘅Whatsapp同Telegram家人Group亦一直仲有佢嘅存在。
呢段日子入面，我玩佢玩過嘅遊戲，睇佢睇過嘅書，近乎係一種自虐嘅心態去做呢件事……或者咁做會重新感覺到佢一絲嘅存在，將佢嘅遺憾同未完成嘅心願都一一完成。
時間會治癒一切，我明，因為人嘅記憶會隨時間遺忘，如果你認為遺忘等同治癒，咁我可以同你講遺忘比起回憶仲令人傷感，世上有好多人同事，並唔會因遺忘而開心，只因佢係同你生命有千絲萬縷嘅關係。
母親節一日，將佢好多遺物都整理好，留低嘅都有唔少，屋企人無人敢去整理，可能大家想一切不變，好似佢仲存在咁，但總需要處理，唯有一邊聽住當日同佢一齊係醫院嘅Playlist一邊收拾。
晚飯之前，我去買外賣，問媽媽想食咩，佢話無所謂，然後就開始喊，話以前一家人齊齊整整時細佬一早就安排好，依家佢唔係度都無心情食……我話佢都想我哋可以開心咁過日子，但最後，係食飯之時，大家沉默地望住電視，除咗講吓食物好唔好食之外，都唔敢講乜。
食食吓，都係忍唔住流下眼淚，唯有轉個頭望住電視，唔想比佢哋見到。
原來人生，係無回頭，好多事同人都係一種不可逆轉嘅狀態，回憶可貴，但用悲哀去憶想過去，卻係一種犧牲現在同將來嘅做法。
當晚我望住佢張床，對住空氣講，我覺得唔可以再咁掛住你喇，但我唔會忘記你，好唔好？
將最終Boss打敗之後，如果係當年的話，我一定擺出一個衰樣，然後同佢講，其實唔難。
依家我會講，如果你咁咁咁打，你都可以打贏。
－－－－－－－－－－－－－－－－－－－－－－－－－
《弊傢伙，我女朋友有咗》經已上架，有興趣的朋友歡迎點擊下列連結購買。
預購 BY Payme, FPS, Alipay連結：https://forms.gle/UEdH32PfVD2cp5nK6
預購By 掌鋪，可以使用Visa Master Card連結：
https://maydreaming.boutir.com/i/WDnmnPAAA
舊作《那天，我出席了一個葬禮》《同學會重遇的那個人》《南極》亦可以同時購買，有興趣的可留言式inbox查詢
Search